Endi haydovchilar faqat o‘z hududida taksichilik qiladi
Bu haqida rasmiy tartib belgilandi.
Yangi tartibga ko‘ra, yo‘nalishsiz taksi haydovchilari faqat litsenziya kartochkasida ko‘rsatilgan hududdagina faoliyat yuritishi mumkin. Bu haqida Transport vazirligi ma’lumot berdi.
Vazirlik axborot xizmati rahbari Navro‘z Ashurmatovga ko‘ra, bu tartib yangilik emas. U 2011-yilda qabul qilingan 139-son qarorda ham mavjud bo‘lgan. Unga asosan, taksi haydovchilari faqat o‘z hududlarida ishlashi kerakligi belgilangan edi. 2025-yilda esa ushbu tartibni yangilagan hujjat qabul qilingan va amaliyotga tatbiq etilmoqda.
Tartib qanday ishlaydi?
Har bir haydovchi o‘z hududida yoki unga tutash hududlarda taksichilik qilishi mumkin.
Masalan, Toshkentda ro‘yxatdan o‘tgan (01 raqamli) avtomobil:
Toshkent shahri
Toshkent viloyati
Sirdaryo viloyatida ishlashi mumkin.
Qashqadaryolik haydovchi esa faqat Qashqadaryoda yoki unga yaqin hududlarda faoliyat yurita oladi.
Bu tartib, rasmiylar ta’kidlashicha, tartibni saqlash, mahalliy haydovchilarning bandligini ta’minlash hamda tashuvlar xavfsizligini oshirish uchun joriy etilgan.
Ayni vaqtda bu holat bo‘yicha ijtimoiy tarmoqlarda ko‘plab muhokamalar bo‘lib o‘tmoqda. Transport vazirligi esa bu qaror allaqachon kuchga kirganini va bosqichma-bosqich amalga oshirilayotganini ma’lum qilgan.
