Eron va Isroil o‘rtasida to‘qnashuvlar kuchaymoqda
Eronda halok bo‘lganlar soni 224 kishiga yetdi.
Isroil havo kuchlari Eron markaziy hududidagi raketa uchirish moslamalariga zarba berdi. Shu bilan birga, Tehrondagi neft bazasi va mudofaa vazirligi binosi ham hujum nishoniga aylandi. Isroil fuqarolarini boshpanalarda qolishga chaqirdi. Bu Eron hujumining kutilayotganidan darak beradi.
Eron esa javoban 100 dan ortiq raketa va dronlar bilan Tel-Aviv hamda Hayfa shaharlarini nishonga oldi. Rasmiy ma’lumotlarga ko‘ra, Hayfada raketa belgilangan obyektga urilgan. Shuningdek, “Rafael” harbiy texnika zavodi ham nishonga olingan.
Isroil hujumlari oqibatida Eron sog‘liqni saqlash vazirligi 224 kishining halok bo‘lganini, 1 277 kishining yaralanganini bildirdi. Aholi orasida vahima kuchaygan, Tehronda ichimlik suvi uzilib qolgan, gaz ombori portlatilgan va ko‘chalarni suv bosgan.
Shanba kuni o‘tkazilishi kerak bo‘lgan Eron va AQSh yadroviy muzokaralari bekor qilindi. Isroilning kutilmagan hujumi uzoq yillik adovatni yana avj oldirdi va mintaqada keng qamrovli urush xavfini kuchaytirdi.
