Qibrayda avtobus va Cobalt avariyaga uchradi
Holat yuzasidan rasmiy munosabat bildirildi.
Kecha, 23 iyun kuni soat 17:00 larda Toshkent viloyati Qibray tumani hududidan o‘tgan D-006 “Toshkent–Chirchiq–Chimyon” avtomobil yo‘lining 6-kilometrida avtobus va Cobalt ishtirokida yo‘l-transport hodisasi yuz berdi. Bu haqida viloyat IIB YHXB rasmiy munosabat bildirdi.
Qayd etilishicha, bir yo‘nalishda harakatlanib kelayotgan, 1983 yilda tug‘ilgan haydovchi boshqaruvidagi “MAN” rusumli avtobus hamda 1997 yilda tug‘ilgan haydovchi boshqaruvidagi “Cobalt” rusumli yengil avtomobil o‘zaro to‘qnashgan.
Yo‘l-transport hodisasi natijasida ushbu transport vositalaridan tashqari yana bir necha avtoulovlarga ham shikast yetgan.
Hodisa oqibatida tan jarohati olgan fuqarolar qayd etilmagan. Holat yuzasidan Qibray tumani IIB Yo‘l harakati xavfsizligi bo‘limi xodimlari tomonidan surishtiruv ishlari olib borilmoqda.
