Eronning yadroviy dasturi butunlay yo‘q qilinmadi — OAV
Donald Tramp esa OAVni “yolg‘onchilar” deya atab, Eron yadroviy inshootlari butunday yo‘q bo‘lib ketganini aytishdan charchamayapti.
AQSH razvedkasi Eronning yadroviy dasturi butunlay yo‘q qilinganini tasdiqlamadi. Oq uy bundan g‘azablandi
Pentagon razvedka boshqarmasi AQSH zarbalari Eronning yadroviy dasturini butunlay yo‘q qilmaganini, faqat uni bir necha oyga orqaga surganini maʼlum qildi. Bu haqida CNN va The New York Times manbalari xabar bermoqda.
"Boyitilgan uran zaxiralari oldindan Fordo, Natanz va Isfahon obyektlaridan boshqa joylarga ko‘chirilgan bo‘lishi mumkin, shuningdek, sentrifugalar zarar ko‘rmagan", deya Pentagon hisobotidan iqtibos keltiradi OAV.
CNN asosiy zarar yer usti inshootlariga yetkazilganini taʼkidladi. Bundan tashqari, NYT‘ning yozishicha, Eronning uranni boyitish bo‘yicha kichik yashirin obyektlari ham zarar ko‘rmagan.
Bloomberg agentligi Isfahon obyektidagi uchta reaktorga zarar yetmaganini xabar qildi. Agentlikning MAGATEdagi (Xalqaro atom energiyasi agentligi) manbalariga ko‘ra, AQSH bu reaktorlarga ataylab hujum qilmagan bo‘lishi mumkin.
Oq uy ushbu xabarlarga keskin munosabat bildirdi. Prezident Donald Tramp ommaviy axborot vositalarini “muvaffaqiyatsizlar” va “yolg‘onchilar” deb atab, ular bomba tashlagan uchuvchilardan uzr so‘rashi kerakligini aytdi.
Oq uy matbuot kotibi Kerolayn Livitt matbuotning shubhalarini "prezidentni kamsitish va jasur uchuvchilarni obro‘sizlantirishga urinish" deb atadi.
"30 ming fut og‘ irlikdagi o‘n to‘rtta bomba aniqlik bilan tashlansa, bu nishon to‘liq yo‘q qilinishini hamma biladi", — dedi Livitt.
Donald Tramp chorshanba kuni AQSHning Eron yadroviy inshootlariga bergan zarbalari "butunlay yo‘q bo‘lib ketgan" degan daʼvosini takrorladi.
Tramp ayni damda Niderlandiyada NATO sammitida bo‘lib, u yerda bir necha soatdan keyin matbuot anjumani o‘tkazishi kutilmoqda.
Tehron esa Isroil va AQSHning yadroviy inshootlarini nishonga olishi ortidan yadroviy qurollarni tarqatmaslik haqidagi asosiy shartnomadan chiqish bilan tahdid qilmoqda.
