Pensiyalar elektron hisoblanadi: yangi onlayn xizmat yo‘lga qo‘yiladi
“Mening pensiyam” xizmati orqali fuqarolar pensiya miqdorini oldindan bilishlari mumkin.
O‘zbekistonda fuqarolar pensiya miqdorini oldindan aniqlash imkoniyatiga ega bo‘lishadi. Bu “Mening pensiyam” deb nomlangan yangi onlayn xizmat orqali amalga oshiriladi. Tizim 2026-yil 1-dekabrdan boshlab ishga tushiriladi.
Prezidentning tegishli farmonida pensiya va g‘aznachilik tizimlarini raqamlashtirish, xizmatlarni to‘liq elektron shaklga o‘tkazish bo‘yicha qator topshiriqlar belgilangan. Jumladan, pensiya ta’minotiga oid barcha xizmatlar proaktiv va interaktiv bo‘lib, aholi murojaatisiz avtomatik ko‘rsatiladi.
Shuningdek, “Raqamli g‘azna” tizimi orqali budjet jarayonlari avtomatlashtiriladi. 2026-yil 1-iyuldan boshlab mazkur tizim ishga tushiriladi.
Bugungi kunda O‘zbekistonda pensiya oluvchilar soni 4,2 million nafarga yetgan. 2025-yil 1-iyuldan boshlab pensiya va nafaqalar 10 foizga oshirilishi belgilangan.
Eng kam miqdordagi pensiya va nafaqalar (oylik hisobda):
Nogironlik pensiyasi: 1 012 000 so‘m
Yoshga doir pensiya (eng kam): 918 000 so‘m
Mehnatga layoqatsizlar uchun nafaqa: 1 012 000 so‘m
Boquvchisini yo‘qotganlar uchun nafaqa: 820 000 so‘m
Urush qatnashchilari uchun pensiya: 4 462 000 so‘m
Pensiyani hisoblashning bazaviy miqdori: 471 000 so‘m (2025-yil 1-iyuldan)
