Xitoy elektr tarmoqlarini o'chirish uchun qurol yaratmoqda
Xitoyning ushbu yangi quroli 10 ming kv. metrni chiroqsiz qoldira oladi.
Xitoy Markaziy televideniesida efirga uzatilgan animatsion video mamlakat yangi turdagi qurol ustida ishlayotganini ko‘rsatdi. Ushbu qurol elektr stansiyalari va uzatish tarmoqlariga zarba berib, katta hududlarda to‘liq elektr uzilishlariga olib kelishi mumkin.
TASS manbasiga tayanib, Oxu.Az xabar berishicha, Xitoyning aerokosmik fan va texnologiyalar davlat korporatsiyasi (CASC) bu qurol dushmanning boshqaruv tizimlarini ishdan chiqarishga qodir ekanini bildirdi. U kamida 10 ming kvadrat metr maydonda elektr ta'minotini izdan chiqarishi mumkin.
Qurolning aniq turi va nomi oshkor qilinmagan. Biroq, South China Morning Post (SCMP) nashri mutaxassislarga tayanib, bu grafit bombasi yoki raketa bo‘lishi mumkinligini taxmin qilmoqda. Ushbu turdagi qurol elektr tarmoqlarida qisqa tutashuvlarni vujudga keltirib, tizimlarni falaj qiladi.
Animatsiyada qurol quruqlikdagi transport vositasidan uchirilayotgani ko‘rsatilgan. U havoga ko‘tarilgach, silindrsimon idishlarni tarqatadi va bu idishlar ichidagi yupqa uglerod tolalari elektr tarmoqlarini shikastlaydi. Qurolning taxminiy uchish masofasi 290 km, zaryad og‘irligi esa 490 kg deb baholanmoqda.
SCMP'ga ko‘ra, hozircha Xitoy Xalq Ozodlik Armiyasi (PLA) bu kabi tizimlarga ega ekani borasida rasmiy ma’lumotlar yo‘q.
