Marsga oid eng yirik meteorit Nyu-Yorkda auksionga qo‘yildi

 

Yerda topilgan Mars meteoritlari ichida eng yirigi sanaluvchi NWA 16788 nomli namunasi AQShning Nyu-York shahridagi Sotheby’s auksionida sotuvga qo‘yildi. Og‘irligi 24,5 kilogramm bo‘lgan ushbu meteorit o‘zining o‘lchami va rangidagi o‘ziga xoslik bilan ajralib turadi.

 

Meteorit 2023-yil noyabr oyida Niger Respublikasining Agadez mintaqasidan topilgan. Mutaxassislarning ta’kidlashicha, bu hozirgacha Yerda topilgan barcha Mars meteoritlari orasida eng kattasi hisoblanadi.

 

Ilmiy tahlillarga ko‘ra, bu bo‘lak Mars yuzasidan kuchli asteroid zarbasi oqibatida ajralib chiqqan va sayyoralararo fazoda uzoq vaqt harakatlangach, Yer atmosferasiga kirib kelgan. Atmosferaga kirish paytida yuzasida yuqori harorat ta’sirida shisha qobiq hosil bo‘lgan. Uning tarkibida maskelynit kabi noyob Marsga xos minerallar aniqlangan.

 

Sotheby’s ushbu meteoritni “tabiiy tarixdagi eng noyob artefaktlardan biri” deb baholab, uni kolleksionerlar va ilmiy doiralar uchun yuksak qadrga loyiq ob’yekt sifatida taqdim etmoqda. Boshlang‘ich narxi bir necha million dollar bo‘lishi kutilmoqda.

 

Shunga qaramay, ayrim olimlar bu kabi tarixiy topilmalarning xususiy qo‘llarga emas, muzey va ilmiy markazlarga topshirilishi kerakligini ta’kidlamoqda. Chunki ular nafaqat ilmiy izlanishlar, balki keng jamoatchilik uchun ham katta ahamiyatga ega.