O‘zbekiston ilk bor BMTning Oziq-ovqat va qishloq xo‘jaligi tashkiloti Kengashiga saylandi
Saylovda O‘zbekiston 2028–2029-yillar uchun bir ovozdan saylangan.
O‘zbekiston ilk bor Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) Kengashiga a’zo bo‘ldi. Saylov Rim shahrida bo‘lib o‘tdi va unda mamlakatimiz 2028–2029-yillar uchun bir ovozdan saylandi.
Bu tarixiy voqea O‘zbekistonning xalqaro maydondagi faolligi va qishloq xo‘jaligi sohasidagi tashabbuslarini e’tirof etish sifatida baholanmoqda. FAO Kengashiga ilk bor saylanish O‘zbekistonning oziq-ovqat xavfsizligi masalalaridagi ishtirokini kuchaytiradi.
Kengash tarkibiga 3 yil muddatga saylanadigan 49 ta davlat kiradi. Ushbu a’zolar FAO byudjeti va dasturlarini muhokama qiladi, shuningdek, tashkilot Konferensiyasiga muhim qaror va tavsiyalar taqdim etadi.
FAO doirasida O‘zbekiston ilgari ham qator hamkorlik loyihalarini amalga oshirgan bo‘lib, bu a’zolik yangi bosqichda faoliyat yuritish imkonini beradi.
