Tramp Yaponiya va Janubiy Koreya mahsulotlariga 25 foizlik boj joriy qildi
Boj to‘lovi faqat tashqi mahsulotlarga nisbatan qo‘llaniladi.
AQShning prezidenti Donald Tramp Yaponiya va Janubiy Koreyadan keltiriladigan barcha mahsulotlarga 25 foizlik boj to‘lovi joriy etilganini e’lon qildi. Bu haqda u har ikki davlat rahbarlariga yuborgan rasmiy maktublarda bayon qilgan.
“Biz ushbu davlatlarning tarif va notarif to‘siqlari tufayli yuzaga kelgan savdo taqchilligiga barham berishimiz kerak. AQSh bozorida adolatli raqobat muhitini tiklash uchun shunday chorani ko‘rmoqdamiz”, — deyiladi Tramp bayonotida.
Trampning ta’kidlashicha, bu boj to‘lovi faqat tashqi mahsulotlarga nisbatan qo‘llaniladi va AQSh hududida ishlab chiqarayotgan Yaponiya yoki Janubiy Koreya kompaniyalariga taalluqli emas. Shu tariqa u mahalliy ishlab chiqaruvchilarni qo‘llab-quvvatlamoqchi ekanini bildirdi.
Mutaxassislar bu qaror ikki davlat o‘rtasidagi savdo munosabatlariga jiddiy ta’sir qilishi mumkinligini aytmoqda. Yaponiya va Janubiy Koreya hukumati hozircha bu borada rasmiy izoh bergani yo‘q.
