O‘zbekiston davlat idoralarida 128 mingdan ortiq qonunbuzarlik aniqlangani ma’lum qilindi
Xizmat ko‘rsatishda eng ko‘p qoidabuzarlik “Hududgazta’minot”da qayd etildi.
Adliya vazirligining ma’lumotlariga ko‘ra, 2025-yilning dastlabki olti oyi davomida O‘zbekiston davlat idoralari tomonidan aholiga xizmat ko‘rsatish jarayonida 128 mingdan ziyod qonunbuzarlik holatlari qayd etilgan.
Qoidabuzarliklarning eng ko‘pi xizmatni belgilangan muddatda ko‘rsatmaslik bilan bog‘liq — bunday holatlar soni 89,8 mingga yetgan. Shuningdek, xizmatni asoslantirilmagan holda rad etish bo‘yicha 23,8 mingta murojaat qayd etilgan. 814 ta holatda esa fuqarolardan ortiqcha hujjatlar talab qilingan.
Statistikaga ko‘ra, eng ko‘p qoidabuzarliklar “Hududgazta’minot” tizimida kuzatilgan — 12,9 mingta. Undan keyingi o‘rinlarda Kadastr agentligi (12,6 mingta), Sog‘liqni saqlash vazirligi (12,2 mingta) va “O‘zsuvta’minot” DUK (7,5 mingta) joylashgan.
Shunga qaramay, ko‘rsatkichlarda ijobiy dinamikaga ham erishilgan: qonunbuzarliklar soni o‘tgan yilning shu davriga nisbatan 3,2 baravarga kamaygan. Xususan, xizmat ko‘rsatish muddati bilan bog‘liq muammolar 3,5 baravar, xizmatni rad etish holatlari esa 2,3 baravar qisqargan.
