Turkiyada ayollar erkaklarga qaraganda uzoq umr ko‘rmoqda
Statistika instituti e’lon qilgan hisobotga ko‘ra, mamlakatda o‘rtacha umr ko'rish yoshi 78 ga yetgan.
Turkiya Statistika instituti tomonidan 2022–2024-yillarga oid “Hayot jadvali” statistik hisobotiga ko‘ra, mamlakatda tug‘ilgan chaqaloq uchun kutilayotgan o‘rtacha umr 78,1 yilni tashkil qilmoqda. Bu avvalgi yillarga nisbatan o‘sish kuzatilayotganini anglatadi.
Ma’lumotlarga ko‘ra, ayollar uchun o‘rtacha umr ko‘rish davomiyligi 80,7 yil bo‘lsa, erkaklar uchun bu ko‘rsatkich 75,5 yilni tashkil etmoqda. Shunga ko‘ra, ayollar erkaklarga nisbatan o‘rtacha 5,2 yil uzoq umr ko‘rmoqda.
Shuningdek, hisobotda ta’lim darajasi bilan umr davomiyligi o‘rtasidagi bog‘liqlik ham ko‘rsatib o‘tilgan. Jumladan, oliy ma’lumotga ega bo‘lgan 30 yoshli shaxslar o‘rta ma’lumotlilarga nisbatan o‘rtacha 5 yil ko‘proq yashashi mumkinligi ta’kidlangan.
Sog‘lom umr ko‘rish davomiyligi esa o‘rtacha 57,6 yil deb baholangan: erkaklarda bu ko‘rsatkich 58,9 yil, ayollarda esa 56,3 yilni tashkil qilmoqda.
Yana bir muhim ko‘rsatkichga ko‘ra, 65 yoshga yetgan shaxslarning kutilayotgan umr davomiyligi o‘rtacha yana 18 yilni tashkil etadi.
Mutaxassislarning fikricha, umr ko‘rish ko‘rsatkichlarining o‘sishiga Turkiyada sog‘liqni saqlash tizimida amalga oshirilgan islohotlar, tibbiy xizmatlar sifatining oshishi hamda jismoniy faollikni rag‘batlantirishga qaratilgan chora-tadbirlar ijobiy ta’sir ko‘rsatmoqda.
