Iordaniya podshohi O‘zbekistonga davlat tashrifi bilan keladi
Samarqandda siyosiy va iqtisodiy hamkorlik masalalari muhokama qilinadi.
Iordaniya podshohi Abdulla II ibn al-Husayn 25–26-avgust kunlari rasmiy davlat tashrifi bilan O‘zbekistonga tashrif buyuradi. Bu tashrif O‘zbekiston Respublikasi Prezidenti Shavkat Mirziyoyevning taklifiga binoan amalga oshirilmoqda, deb xabar beradi Prezident matbuot xizmati.
Tashrifning asosiy tadbirlari Samarqand shahrida bo‘lib o‘tadi. Tomonlar siyosiy, savdo-iqtisodiy va investitsiyaviy sohalardagi hamkorlikni rivojlantirish, shuningdek kimyo, farmatsevtika, qishloq xo‘jaligi, to‘qimachilik, konchilik va boshqa tarmoqlarda qo‘shma loyihalarni yo‘lga qo‘yish masalalarini muhokama qiladi.
Shuningdek, davlat rahbarlari xalqaro va mintaqaviy siyosatning dolzarb masalalari bo‘yicha fikr almashadi. Muzokaralar yakunida ikki tomonlama hujjatlar va bitimlar to‘plami imzolanishi rejalashtirilgan.
