Zelenskiy Lukashenkoga qarshi sanksiyalar joriy qildi
Cheklovlar Belarus rahbarining Ukrainaga kirishini taqiqlash, aktivlarini muzlatish, savdo va tranzit operatsiyalarini cheklash, shuningdek, moliyaviy operatsiyalarni amalga oshirishni taqiqlashni o‘z ichiga oladi.
Vladimir Zelenskiy Belarus rahbari Aleksandr Lukashenkoga nisbatan sanksiyalar joriy etilganini ma’lum qildi. Mazkur qaror Ukraina milliy xavfsizligi hamda suverenitetini himoya qilishga qaratilgani ta’kidlandi. Bu haqda o'zining Telegram kanalida ma'lum qilgan.
“Aleksandr Lukashenko anchadan beri Belarus suverenitetini shaxsiy hokimiyat evaziga sotmoqda va ruslarga sanksiyalarni chetlab o‘tishda yordam bermoqda”, deb yozgan Zelenskiy.
Rasmiy ma’lumotlarga ko‘ra, sanksiyalar paketi Belarus rahbari va u bilan bog‘liq subyektlarga nisbatan bir qator cheklov choralarini o‘z ichiga oladi. Jumladan, Ukrainaga kirishni taqiqlash, aktivlarni muzlatish, savdo va tranzit operatsiyalarini cheklash, shuningdek, moliyaviy operatsiyalarni amalga oshirishni taqiqlash nazarda tutilgan. Ayrim sanksiyalar muddatsiz amal qilishi mumkin.
Ukraina rasmiylari ushbu choralarni Belarusning Rossiya bilan harbiy-siyosiy hamkorligi, shuningdek, Rossiyaga xalqaro sanksiyalarni chetlab o‘tishda yordam berayotgani haqidagi ayblovlar bilan izohladi.
2025-yil sentabr oyida Belarus prezidenti Minsk Ukraina mojarosini hal qilishda Rossiyani qo‘llab-quvvatlashini va bundan keyin ham qo‘llab-quvvatlashini aytgan. Lukashenko "kim haq, kim nohaq ekanligini vaqt ko‘rsatadi", deb taʼkidlagan.
Zelenskiy bayonotida Belarus hududida Rossiya harbiy infratuzilmasi joylashtirilgani, jumladan, zarba beruvchi dronlar va raketa tizimlari faoliyati kuchaygani alohida qayd etilgan. Ukraina tomoni bunday harakatlar mintaqaviy xavfsizlikka tahdid tug‘dirishini ta’kidlamoqda.
Shuningdek, Ukraina rahbari Belarus korxonalari tomonidan Rossiya harbiy sanoat majmuasiga texnika, maxsus uskunalar yetkazib berilayotgani haqidagi ma’lumotlarni ham keltirgan. Uning ta’kidlashicha, bu Ukrainaga qarshi harbiy harakatlar olib borilishiga bilvosita yordam sifatida baholanmoqda.
