Hormuz bo‘g‘ozida 3200 kema xavfsiz o‘tishni kutmoqda
Muqobil yo‘nalishlarga o‘tish logistika xarajatlari va yetkazib berish vaqtini oshirmoqda.
Xalqaro media manbalariga ko‘ra, Hormuz bo‘g‘ozida xavfsiz o‘tishni kutayotgan kemalar soni keskin oshgan. Fox News xabar berishicha, hozirda mazkur hududda qariyb 3200 kema navbatda turibdi.
Ma’lumotlarga ko‘ra, ularning 800 ga yaqini tankerlar va quruq yuk tashuvchi kemalardan iborat. Vaziyat mintaqada dengiz logistikasiga sezilarli bosimni kuchaytirmoqda.
Kpler tahlilchisi Mett Smit so‘nggi kunlarda bo‘g‘oz orqali neft mahsulotlari harakati deyarli to‘xtaganini ta’kidlagan. Uning so‘zlariga ko‘ra, “bo‘g‘ozda neft oqimi kuzatilmayapti, amalda bu yo‘nalish to‘xtab qolgan”.
Xalqaro dengiz tashkiloti ma’lumotlariga ko‘ra, mavjud holat tufayli mintaqada taxminan 20 ming dengizchi turli kemalarda qolib ketgan. Ayrim kemalar muqobil yo‘nalishlar orqali harakatlanayotgan bo‘lsa-da, bu logistika xarajatlari va yetkazib berish muddatlarining oshishiga olib kelmoqda.
Hormuz bo‘g‘ozi jahon energiya tashuvining muhim yo‘llaridan biri bo‘lib, global neft savdosining taxminan 20 foizi aynan shu hudud orqali amalga oshiriladi.
