Isroil vaziri Al-Aqso masjidi hududida ibodat qildi

Isroilning milliy xavfsizlik vaziri Itamar Ben-Gvir Quddusdagi Al-Aqso masjidi majmuasiga tashrif buyurdi. Mazkur tashrifni Iordaniya va Falastin keskin tanqid qildi. Bu haqda Reuters xabar bermoqda.

 

Ma’lumki, Quddusning Eski shahrida joylashgan mazkur hudud Yaqin Sharqdagi eng nozik nuqtalardan biri hisoblanadi. Yahudiylar uchun Ma’bad tog‘i sifatida muqaddas bo‘lgan ushbu maskan, musulmonlar uchun ham islomdagi uchinchi muqaddas qadamjo sanaladi.

 

Amaldagi tartibga ko‘ra, majmua Iordaniyaga qarashli vaqf tomonidan boshqariladi. Yahudiylarga tashrif buyurishga ruxsat berilgan bo‘lsa-da, u yerda ibodat qilish taqiqlangan. Mutaxassislar qayd etishicha, ushbu tartibni o‘zgartirishga urinishlar avval ham keskin norozilik va zo‘ravonliklarga olib kelgan.

 

Qayd etilishicha, tashrif chog‘ida Itamar Ben-Gvir o‘zini “bu yerning egasidek his qilayotganini” aytib, yahudiylarning ibodati uchun kengroq imkoniyatlar yaratish tarafdori ekanini bildirdi. U, shuningdek, bosh vazir Benjamin Netanyahuni bu borada yanada qat’iy choralar ko‘rishga chaqirdi.

 

Iordaniya tashqi ishlar vazirligi ushbu tashrifni status-kvo kelishuvining buzilishi va muqaddas joyga nisbatan hurmatsizlik sifatida baholadi. Falastin prezidenti Mahmud Abbos ma’muriyati esa bu kabi harakatlar mintaqadagi vaziyatni yanada beqarorlashtirishi mumkinligini ta’kidladi.

 

Ben-Gvirning matbuot kotibi vazir yahudiylar uchun kirish va ibodat qilish imkoniyatlarini kengaytirishga intilayotganini ma’lum qildi. Uning so‘zlariga ko‘ra, vazir tashrif davomida ibodat ham qilgan.

 

Reuters ayni paytda Benjamin Netanyahu devonidan ushbu tashrif yuzasidan rasmiy izoh berilmaganini yozmoqda. Avvalgi shunga o‘xshash holatlarda esa Isroil hukumati status-kvo saqlanishini ta’kidlab kelgan.

 

Avvalroq Eron bilan urush davrida Al-Aqso masjidi majmuasi jamoatchilik uchun vaqtincha yopilgani haqida xabar berilgandi. Yaqinda masjid hududi ochilib, majmuada 3000 dan ortiq falastinlik namoz o‘qigan edi.