Pasxa sulhi yakunlandi: Rossiya va Ukraina o‘rtasida dronlar hujumi boshlandi
Ukraina mamlakatga uchirilgan 98 ta drondan 87 tasini yo‘q qilgan. Rossiya 33 ta dronni tutib qolgan.
Pasxa munosabati bilan e’lon qilingan sulh yakunlanganidan so‘ng Rossiya va Ukraina o‘rtasidagi harbiy harakatlar yana kuchaydi. Bu haqda Deutsche Welle xabar berdi.
Ukraina Qurolli Kuchlari xabar berishicha, 13-aprel kuni mahalliy vaqt bilan soat 00:10 dan boshlab Rossiya qo‘shinlari mamlakatning shimoliy va sharqiy hududlariga 98 ta zarbdor dron, asosan Shahed dronlari bilan hujum uyushtirgan. Soat 08:00 ga qadar havo hujumidan mudofaa tizimlari 87 ta dronni yo‘q qilgan, biroq 10 ta hududda dron zarbalari yoki ularning parchalari tushgani qayd etilgan.
Chernigovoblenergo ma’lumotiga ko‘ra, Chernigov viloyatidagi energetika obyektiga qilingan hujum oqibatida 12 mingdan ortiq iste’molchi elektr ta’minotisiz qolgan. Xerson viloyatida esa portlashlar natijasida ikki nafar fuqaro turli darajada jarohat olgan.
Rossiya tomoni ham dron hujumlari qayd etilganini ma’lum qildi. Rossiya Mudofaa vazirligi hisobotiga ko‘ra, havo hujumidan mudofaa tizimlari Belgorod, Kursk, Rostov, Bryansk, Smolensk viloyatlari hamda anneksiya qilingan Qrim hududi ustida Ukrainaga tegishli 33 ta dronni tutib olgan va yo‘q qilgan.
Belgorod viloyati gubernatori Vyacheslav Gladkov Grayvoron shahridagi dron hujumi oqibatida bir mahalliy ayol va “Orlan” bo‘linmasining bir harbiy xizmatchisi jarohat olganini bildirdi. U jabrlanganlar bir dron yoki bir nechta alohida hujumlar natijasida yaralanganiga aniqlik kiritmagan.
Avvalroq Rossiya va Ukraina yetakchilari Pasxa munosabati bilan bir yarim kunlik sulhga kelishgani haqida xabar berilgandi.
