Toshkent aeroportida giyohvand modda olib kirmoqchi bo‘lgan xorijlik ushlandi
U 6 kilogrammdan ortiq giyohvand moddani yuklari orasiga yashirib olib o‘tmoqchi bo‘lgan.
Toshkent xalqaro aeroportida giyohvandlik vositalarini yashirincha olib o‘tishga uringan yo‘lovchi to‘xtatib qolindi. Bu haqda Bojxona qo‘mitasi xabar berdi.
Qayd etilishicha, Bangkokdan uchib kelgan xorijlik yo‘lovchilardan biriga tegishli qo‘l yuki va bagajlari bojxona nazoratidan o‘tkazilganida, yuklar orasida turli qadoqlar ichida 12 dona polietilen o‘ram yashirilgani aniqlangan.
Belgilangan tartibda va xolislar ishtirokida ushbu o‘ramlar ochib ko‘rilganida, ularning ichidagi yashil rangdagi o‘tkir hidli modda Markaziy bojxona laboratoriyasi xulosasiga ko‘ra, 6.3 kg.dan ziyod og‘irlikdagi quritilgan marixuana ekanligi ma’lum bo‘lgan.
Holat yuzasidan bojxona organlari tomonidan jinoyat ishi qo‘zg‘atildi.
Ma’lumotlarga ko‘ra, “Toshkent-Aero” IBK tezkor tuzilmalari va bojxona postlari xodimlari tomonidan joriy yilning dastlabki choragida aniqlangan 15 ta holatda salkam 30 kilogramm og‘irlikdagi giyohvandlik vositalarining, shu jumladan sintetik narkotiklarning bojxona chegaralari orqali noqonuniy ravishda olib o‘tilishi va ichki hududdagi yashirin aylanmasiga chek qo‘yilgan. Aniqlanayotgan giyohvandlik vositalari o‘tgan yilning shu davriga nisbatan 18 kilogrammga oshgan.
