Uganda generali Turkiyadan 1 milliard dollar va “eng go‘zal ayol”ni talab qildi
Qo‘mondon Turkiyani Somalidagi infratuzilma loyihalaridan foyda ko‘rishda aybladi.
Uganda qurolli kuchlari bosh qo‘mondoni Muhoozi Kainerugaba Turkiya bilan munosabatlar fonida keskin bayonot bilan chiqdi. U Turkiyadan 1 milliard dollar miqdorida mablag‘ hamda “eng go‘zal ayol”ni rafiqasi sifatida taqdim etishni talab qilganini ma’lum qilgan. Bu haqda TASS xabar berdi.
Generalning ta’kidlashicha, mazkur talablar Kampala va Istanbul o‘rtasidagi ehtimoliy keskinliklarning oldini olish maqsadida ilgari surilgan. U, shuningdek, agar ushbu talablar bajarilmasa, 30 kun ichida Turkiya bilan diplomatik aloqalar uzilishi mumkinligini bildirgan.
Muhoozi Kainerugaba o‘z bayonotida Turkiyani Somalidagi infratuzilma loyihalari hamda mintaqadagi iqtisodiy faoliyat orqali manfaat ko‘rishda ayblagan. Uning fikricha, talab qilinayotgan mablag‘lar Turkiyaning mintaqadagi ishtiroki uchun “xavfsizlik dividendi” sifatida qaralishi lozim.
Shuningdek, u ijtimoiy tarmoqlardagi chiqishida Turkiyaning “eng go‘zal ayoli”ni o‘z rafiqasi sifatida taqdim etish haqidagi talabni ham bildirgan, biroq mazkur post keyinchalik o‘chirib tashlangan.
