Kreml Peter Madyarni g‘alaba bilan tabriklashdan bosh tortdi
Rossiya Prezidenti matbuot kotibi “do‘st bo‘lmagan” davlatlarga tabrik yo‘llanmasligini bildirdi.
Rossiya Vengriyadagi parlament saylovlarida g‘alaba qozongan muxolifat yetakchisi Peter Madyarni tabriklamaydi. Bu haqda Rossiya Prezidenti matbuot kotibi Dmitry Peskov ma’lum qildi.
Peskovning aytishicha, Moskva “do‘st bo‘lmagan davlatlar” rahbarlariga tabrik yo‘llamaydi. U Vengriya Rossiyaga qarshi sanksiyalarni qo‘llab-quvvatlayotgani sababli aynan shunday toifaga kiritilganini ta’kidladi.
Shu bilan birga, jurnalistning “Bu Moskva faqat Vengriya Bosh vaziri Viktor Orban bilan do‘st ekanligini anglatadimi”, degan savoliga javoban u Rossiya ilgari Vengriya bosh vaziri Viktor Orban bilan muloqot olib borganini qayd etdi.
Ma’lumot uchun, Vengriya 2022-yil 5-martdan buyon Rossiya tomonidan “do‘st bo‘lmagan davlatlar” ro‘yxatiga kiritilgan. Shunga qaramay, o‘sha yil aprel oyida Vladimir Putin Orbanni parlament saylovlaridagi g‘alabasi bilan rasman tabriklagan edi.
13-aprel kuni o‘tkazilgan brifingda Peskov Kreml Vengriya xalqining tanloviga “hurmat bilan qarashi”ni bildirib, yangi rahbariyat bilan “pragmatik aloqalarni davom ettirish” niyati borligini ham qo‘shimcha qildi.
Eslatib o‘tamiz, 12-aprel kuni bo‘lib o‘tgan saylovlarda hukmron “Fides” partiyasi muxolifatdagi “Tisa”ga yutqazdi.
