Qirg‘izistonda rus tilidagi qishloqlar nomi o‘zgartiriladi — Sadir Japarov
Mazkur jarayonni 2027-yilgacha yakunlash rejalashtirilgan.
Qirg‘iziston prezidenti Sadyr Japarov mamlakatdagi rus tilidagi qishloqlar nomlarini qirg‘izchaga o‘zgartirish rejalashtirilayotganini ma’lum qildi. Bu haqda u O‘sh viloyati Oloy tumani aholisi bilan uchrashuvda aytib o‘tgan.
Davlat rahbarining so‘zlariga ko‘ra, mazkur tashabbus milliy o‘zlik va madaniy merosni mustahkamlashga qaratilgan bo‘lib, jarayonni 2027-yilgacha yakunlash rejalashtirilgan.
“Hozir biz butun respublika bo‘yicha qishloqlarning ruscha nomlarini o‘zgartirishni rejalashtirmoqdamiz. Kelgusi yilda bu jarayonni yakunlamoqchimiz”, — degan u.
Shu bilan birga, prezident aholi punktlariga shaxslar nomini berishni taqiqlash qarori qabul qilinganini ham qayd etgan. Uning fikricha, bu amaliyot ko‘pincha jamiyatda bo‘linishlarga sabab bo‘ladi.
“Odamlar guruhlarga ajralib, kimning nomi berilishi kerakligi ustida bahslashadi. Bunday holatlarni ko‘p bor ko‘rganmiz”, — dedi Japarov.
Biroq mazkur bayonot ortidan Rossiyaning TASS va RIA Novosti agentliklari prezident matbuot xizmati bilan bog‘langanda, davlat rahbari vakili Asqat Alagozov gap ruscha nomlarni o‘zgartirish haqida emas, balki aynan shaxslar nomini berishni taqiqlash haqida ketganini bildirgan.
Shu bilan birga, prezident rasmiy saytida ham rus tilidagi qishloq nomlarini ommaviy o‘zgartirish bo‘yicha ma’lumot berilmagan. Ammo ijtimoiy tarmoqlarda tarqalgan videolarda Japarov bu masalaga to‘xtalgani aks etgan.
