Toshkent aeroportida sport ozuqasi sifatida qadoqlangan narkotik moddalar aniqlandi
Sport ozuqasi sifatida ko‘rsatilgan qo‘shimchalar ichidan 350 ming dollar qiymatdagi sintetik narkotik modda topildi.
Toshkent xalqaro aeroportida bojxona xodimlari tomonidan sintetik giyohvandlik vositalarini biologik faol qo‘shimcha sifatida olib kirishga uringan qo‘shni davlat fuqarosi qo‘lga olindi. Bu haqda Bojxona qo‘mitasi matbuot kotibi xabar berdi.
Ma’lum qilinishicha, yo‘lovchi bojxona nazoratining “yashil” yo‘lagidan o‘tishga uringan vaqtida uning bagajidagi sport ozuqasi sifatida taqdim etilgan ikki dona biologik faol qo‘shimcha qutisi bojxonachilar e’tiborini tortgan.
Tekshiruv davomida ushbu kapsulalar asl ko‘rinishidan farq qilishi aniqlangan. Xususan, ishlab chiqaruvchi ma’lumotlariga ko‘ra qutilarda 760 dona oq rangli kapsula bo‘lishi lozim bo‘lgan bo‘lsa, amalda ularning soni 920 tani tashkil etgani, kapsulalar esa sariq va qizil ranglarda ekani ma’lum bo‘lgan. Bu esa mahsulotlar qo‘lbola tarzda qayta qadoqlanganini ko‘rsatgan.
O‘zbekiston Respublikasi Bojxona qo‘mitasi Markaziy bojxona laboratoriyasi xulosasiga ko‘ra, kapsulalar tarkibida “Alfa-PVP” turidagi sintetik narkotik modda borligi aniqlangan. Ushbu giyohvandlik vositalarining qora bozorida chakana narxi 350 ming dolllargacha yetishi qayd etildi.
"Toshkent-AERO" IBK tezkor tuzilmalari tomonidan tezkor tadbir Yuqorichirchiq tumanida davom ettirilib, ushbu yo‘lovchi keyinchalik "zakladka" usulida tarqatish uchun mo‘ljallangan giyohvandlik vositasini yashirib ketgan manzil-havola ham topilgan. Ko‘zdan kechirish jarayonida yashirin joydan bir dona polietilen paket topilib, uning ichida taxminan yarim kilogramm og‘irlikdagi “gashish” moddasi borligi aniqlangan.
Mazkur holat yuzasidan bojxona organlari tomonidan jinoyat ishi qo‘zg‘atilib, tergov harakatlari olib borilmoqda.
