“Xalqlar do‘stligi saroyi” hududidagi reklama bannerlari olib tashlandi

Madaniy meros agentligi barcha davlat idoralari hamda tadbirkorlarni madaniy meros obyektlariga hurmat bilan munosabatda bo‘lishga chaqirdi hamda “Xalqlar do‘stligi saroyi” hududidagi reklama bannerlari olib tashlanganini ma'lum qildi.

 

Agentlik ma’lumotiga ko‘ra, 2026-yil 14-aprel kuni Toshkent shahrining Shayxontohur tumani, Furqat ko‘chasida joylashgan “Xalqlar do‘stligi saroyi” hududida monitoring ishlari o‘tkazilib, unda Madaniy meros agentligi va uning Toshkent shahar hududiy boshqarmasi mutaxassislari ishtirok etgan.

 

O‘rganishlar Vazirlar Mahkamasining 2021-yil 15-oktabrdagi 649-son qarori bilan tasdiqlangan nizom talablari asosida olib borilgan. Natijada mazkur madaniy meros obyektida reklama bannerlari hech qanday ruxsatsiz, o‘zboshimchalik bilan o‘rnatilgani aniqlangan.

 

Qayd etilishicha, O‘zbekiston Respublikasi “Reklama to‘g‘risida”gi Qonunning 26-moddasida tashqi reklama va axborot obyektlariga (konstruksiyalariga) doir asosiy talablar belgilangan. Unga ko‘ra, moddiy madaniy meros obyektlarida tashqi reklamani joylashtirish taqiqlanadi. Holat yuzasidan noqonuniy bannerlar zudlik bilan olib tashlandi hamda mas’ullarga nisbatan tegishli choralar ko‘rish bo‘yicha ogohlantirish berilgan.

 

Agentlik bunday holatlar madaniy merosga zarar yetkazishi mumkinligini ta’kidlab, barcha tashkilot va tadbirkorlarni belgilangan tartiblarga qat’iy rioya qilishga chaqirdi.