O'zbekistonda Afg‘onistondan olib kelingan qariyb 9 kg giyohvand modda savdosi to‘xtatildi
Qonunbuzarlar mazkur giyohvandlik vositalarini Xorazm viloyatida sotmoqchi bo‘lgan.
Xorazm viloyatida yirik miqdordagi giyohvandlik vositalarining noqonuniy aylanmasiga chek qo‘yildi. Bu haqda DXX xabar berdi.
Ma’lum qilinishicha, birinchi holatda Qo‘shko‘pir tumanida yashovchi, 1985-yilda tug‘ilgan va avval giyohvandlik vositalari savdosi bilan bog‘liq jinoyati uchun sudlangan shaxs Urganch tumani hududida harakatlanayotgan vaqtida to‘xtatilgan. Xolislar ishtirokida o‘tkazilgan tekshiruv davomida uning yonidan 4 kg 407 gramm “opiy” moddasi aniqlanib, protsessual tartibda rasmiylashtirib olingan.
Ikkinchi holatda esa “Beruniy–Urganch” yo‘nalishida harakatlanayotgan “Lacetti” rusumli avtomobil Urganch tumanidagi “Cholish” YPX maskanida to‘xtatilib, ko‘zdan kechirilgan. Natijada avtomobilda ketayotgan Qo‘shko‘pir tumanida yashovchi, 2002-yilda tug‘ilgan va muqaddam narkojinoyat sodir etgani uchun sudlangan shaxsga tegishli 4 kg 541 gramm “opiy” moddasi borligi aniqlanib, ashyoviy dalil sifatida rasmiylashtirib olingan.
Ta’kidlanishicha, har ikki holatda ham qonunbuzarlar Afg‘onistondan kontrabanda yo‘li bilan olib kelingan giyohvandlik vositalarini Xorazm viloyatida sotish orqali katta daromad olishni rejalashtirgan.
Mazkur holatlar yuzasidan ularga nisbatan Jinoyat kodeksining 28, 246-moddasi 2-qismi va 25, 273-moddasi 5-qismi bilan jinoyat ishlari qo‘zg‘atilib, “qamoq” ehtiyot chorasi qo‘llangan. Hozirda tergov harakatlari olib borilmoqda.
Mutasaddilar giyohvandlik vositalari savdosiga qarshi kurashishda har bir fuqaroning faol fuqarolik pozitsiyasi muhim ekanini ta’kidlab, bunday illatlarga befarqlik og‘ir oqibatlarga olib kelishi mumkinligini eslatdi.
