Rossiyada portlash oqibatida bir nafar o‘zbekistonlik halok bo‘ldi
Portlash chiqindi konteynerlarini yuklash vaqtida sodir bo‘lgan.
Rossiyaning Vladikavkaz shahrida chiqindi konteynerlarini yuklash vaqtida sodir bo‘lgan portlash oqibatida bir kishi halok bo‘ldi. Bu haqda TASS xabar bermoqda.
Shimoliy Osetiya rahbari Sergey Menyaylo ma’lum qilishicha, hodisa 17-aprel kuni ertalab Internatsionalnaya ko‘chasi va Partizanskiy tor ko‘chasi kesishgan hududda yuz bergan. Portlash vaqtida hududni tozalash ishlarini olib borayotgan kommunal xizmat xodimi voqea joyida vafot etgan.
Ma’lum bo‘lishicha, halok bo‘lgan shaxs O‘zbekiston fuqarosi bo‘lib, uning besh nafar farzandi bor.
Hodisa joyida favqulodda xizmatlar va huquqni muhofaza qiluvchi organlar ish olib bormoqda. Prokuratura tomonidan tekshiruv boshlangan, tergov organlari ham voqea yuzasidan surishtiruv o‘tkazmoqda.
Dastlabki ma’lumotlarga ko‘ra, portlashga chiqindi konteyneri ichida bo‘lgan portlovchi buyumlar sabab bo‘lgan. Holat yuzasidan Rossiya Jinoyat kodeksining 109-moddasi (ehtiyotsizlik oqibatida o‘limga sabab bo‘lish) bilan jinoyat ishi qo‘zg‘atilgan.
