Toshkent aeroportida Turkiyaga bir qizni fohishalikka yuborayotgan ayol ushlandi
U maqsadiga erishish uchun jabrlanuvchiga aviachipta olib bergan.
Toshkentda odam savdosi bilan bog‘liq navbatdagi jinoyat holati aniqlanib, uning oldi olindi. Bu haqda DXX xabar berdi.
Ma’lum qilinishicha, Toshkent viloyatining Yangiyo‘l shahrida yashovchi, 1982-yilda tug‘ilgan ayol Chinoz tumanida istiqomat qiluvchi, 2000-yilda tug‘ilgan qizni xorijga olib chiqib, jinsiy ekspluatatsiya qilishni rejalashtirgan.
U jabrlanuvchiga aviachipta xarid qilib bergan hamda keyinchalik uning ishlab topadigan daromadining yarmini doimiy ravishda berib borishini talab qilgan.
Tezkor choralar natijasida gumonlanuvchi ayol jabrlanuvchi bilan birga Toshkent xalqaro aeroportidan Istanbul shahriga uchib ketmoqchi bo‘lgan vaqtida to‘xtatib qolingan.
Mazkur holat yuzasidan ayolga nisbatan Jinoyat kodeksining 135-moddasi (odam savdosi) bilan jinoyat ishi qo‘zg‘atilib, hozirda tergov harakatlari olib borilmoqda.
Avvalroq Farg‘ona viloyatida yashovchi ayol ham bir qizni aldov yo‘li bilan Turkiyaning Izmir shahriga yuqori daromadli ish va’da qilib, fohishalik uchun yuborishni rejalashtirgani va qo‘lga olingani haqida xabar berilgandi.
