AQSh kuchlari xalqaro suvlarda Eron bilan bog'liq kemalarni qo'lga oladi — WSJ
AQSh dengiz blokadasi Yaqin Sharqdan tashqariga ham yoyilishi rejalashtirilmoqda.
The Wall Street Journal nashrining xabar berishicha, AQSh harbiy kuchlari xalqaro suvlarda Eron bilan aloqador deb gumon qilingan neft tanker va tijorat kemalarini qo‘lga olish amaliyotlarini boshlashga tayyorgarlik ko‘rmoqda.
Manbalarga ko‘ra, Vashington yaqin kunlarda mazkur turdagi kemalarga chiqish va ularni tekshirish amaliyotlarini faollashtirishni rejalashtirmoqda. Bu orqali AQShning dengizdagi nazorat choralarini Yaqin Sharq hududidan tashqariga kengaytirish ko‘zda tutilmoqda.
Nashr ta’kidlashicha, ushbu strategiya Eron neftini tashuvchi tankerlar hamda Islom Respublikasi bilan bog‘liq logistika va yuk tashish tarmoqlariga tegishli kemalarni global miqyosda kuzatish va cheklashga qaratilgan bo‘lishi mumkin.
Avvalroq AQSh Markaziy qo‘mondonligi tomonidan e’lon qilingan ma’lumotlarda ham Eron bilan bog‘liq dengiz yo‘llarida qatnovni nazorat qilish va ayrim kemalar harakatini cheklash choralari ko‘rib chiqilayotgani qayd etilgan edi.
