Eron dengiz floti dushmanlarga zarba berishga tayyor — Xomanaiy
Eron Oliy rahbari dengiz floti har qanday tahdidlarga qarshi javob berishga tayyorligini ma’lum qildi.
Eron Oliy rahbari Mujtabo Xomanaiy mamlakat armiyasi kuni munosabati bilan yo‘llagan tabrigida Eron dengiz floti har qanday tahdidlarga qarshi qat’iy javob berishga tayyor ekanini bildirdi.
IRNA agentligi xabariga ko‘ra, tabrik matnida Eron qurolli kuchlari, xususan, dengiz floti salohiyati yuqori baholanib, mamlakat xavfsizligini ta’minlash yo‘lida yangi vazifalar belgilab berilgan.
Xomanaiy o‘z murojaatida Eron armiyasining mudofaa qudratini yanada mustahkamlash, zamonaviy texnologiyalar va harbiy imkoniyatlarni kengaytirish zarurligini ta’kidlagan.
Bayonotda, shuningdek, dron va dengiz kuchlarining har qanday dushmanona harakatlarga qarshi tezkor javob qaytarishga tayyor ekani qayd etilgan.
Ma’lumot uchun, Eron armiyasi kuni har yili 18-aprel sanasida nishonlanadi. Bu sana Islom inqilobidan keyin joriy etilgan bo‘lib, mamlakat muntazam armiyasi faoliyatiga bag‘ishlangan.
Mazkur bayonot Eron tomonidan Hormuz bo‘g‘ozi ustidan harbiy nazorat kuchaytirilgani haqidagi xabarlar fonida yangragan.
