Sirdaryoda taqiqlangan modda mavjud ozdiruvchi qahvalar to‘xtatib qolindi
Haydovchi mazkur mahsulotlarni 200 dollar evaziga bojxonadan olib o‘tmoqchi bo‘lgan.
Sirdaryo viloyatida tarkibida kuchli ta’sir qiluvchi modda mavjud bo‘lgan biologik faol qo‘shimchalarni noqonuniy olib kirishga urinish holati aniqlandi. Bu haqda Bojxona qo‘mitasi xabar berdi.
Ma’lum qilinishicha, “Malik” chegara bojxona posti orqali mamlakat hududiga kirib kelgan fuqaro boshqaruvidagi Lacetti rusumli avtomobil belgilangan tartibda bojxona nazoratidan o‘tkazilgan. Tekshiruv jarayonida yuklar orasida bojxona nazoratidan yashirilgan, 8 va 10 grammli qadoqlarda joylangan uch turdagi qahva mahsulotlari aniqlangan.
Ekspertiza xulosasiga ko‘ra, jami 2258 dona ushbu mahsulotlar tarkibida O‘zbekistonda muomalasi cheklangan “Sibutramin” moddasi borligi ma’lum bo‘lgan. Dastlabki ma’lumotlarga ko‘ra, haydovchi mazkur mahsulotlarni 200 AQSH dollari evaziga bojxonadan olib o‘tmoqchi bo‘lgan.
Qonunchilikka muvofiq, ushbu moddaning hatto oz miqdori ham jinoiy javobgarlikka sabab bo‘lishi mumkin.
Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
