Namanganda fuqarolarni Hajga noqonuniy yuborayotgan shaxs ushlandi

Namangan viloyatida fuqarolarni “Haj-2026” mavsumiga noqonuniy tarzda yuborishni va’da qilib, pul talab qilgan shaxs qo‘lga olindi. Bu haqda DXX xabar berdi.

 

Ma’lum qilinishicha, Namangan shahrida yashovchi, 1984-yilda tug‘ilgan shaxs Chust tumanida istiqomat qiluvchi to‘rt nafar fuqaroni “Haj-2026” mavsumida Saudiya Arabistoniga yuborishni va’da qilib, buning evaziga 26 ming AQSH dollari talab qilgan.

 

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbir davomida u so‘ralgan mablag‘ning 6 ming AQSH dollarini olgan vaqtida ashyoviy dalillar bilan ushlangan.

 

Holat yuzasidan unga nisbatan Jinoyat kodeksining 168-moddasi, 4-qismi “a” bandi (firibgarlik) bilan jinoyat ishi qo‘zg‘atilib, tergov harakatlari olib borilmoqda.

 

“Haj” tadbiri O‘zbekiston Respublikasi Din ishlari bo‘yicha qo‘mitasi va Saudiya Arabistoni Podshohligi Haj vazirligi o‘rtasida har yili imzolanadigan shartnoma asosida O‘zbekiston musulmonlari idorasi tomonidan amalga oshiriladi.

 

Ma’lumot uchun, 18-apreldan boshlab Haj vizasiga ega bo‘lgan shaxslardan tashqari, boshqa barcha turdagi vizaga ega fuqarolarning Makkaga kirishi yoki shaharda qolishi taqiqlanadi.

 

Shuningdek, 13-apreldan e’tiboran Makkaga kirishni istagan shaxslar vakolatli organlardan rasmiy ruxsatnoma olishi lozim. Ruxsatsiz shaharga kirishga yo‘l qo‘yilmaydi.