Andijonda bank mansabdori 40 ming dollar pora bilan ushlandi
U kredit ta’minoti uchun garovga qo‘yilgan binoni tadbirkorga auksionsiz olib berish evaziga 90 ming dollar talab qilgan.
Andijon viloyatida bank tizimida faoliyat yuritgan mansabdor shaxs katta miqdorda pora olishda gumon qilinib ushlandi. Bu haqda DXX xabar berdi.
Ma’lum qilinishicha, Andijon viloyatidagi banklardan birining bosh boshqarmasi boshlig‘i o‘rinbosari kredit ta’minoti uchun garovga qo‘yilgan mulklarni auksion va to‘g‘ridan to‘g‘ri sotuvga chiqarish vakolatiga ega bo‘lgani holda, xizmat mavqeidan foydalanib, shaxsiy boylik orttirmoqchi bo‘lgan.
U kredit ta’minoti uchun garovga qo‘yilgan, Asaka tumanida joylashgan, umumiy bahosi 16,8 mlrd so‘mlik xususiy davolash markazining 4 qavatli binosi auksion savdo platformasida sotuvdan qaytganligidan foydalangan. Bank xodimi binoning narxini 12 mlrd so‘mga tushirib, bank tashkiloti hisobiga olib, mahalliy tadbirkorga auksion savdolarisiz 7-yil muddatga foizsiz kredit hisobidan olib berish evaziga 90 ming AQSH dollari talab qilgan.
Davlat xavfsizlik xizmati xodimlari tomonidan o‘tkazilgan tezkor tadbirda ushbu mansabdor shaxs 40 ming AQSH dollari olgan vaqtida ashyoviy dalillar bilan ushlandi.
Hozirda unga nisbatan jinoyat ishi qo‘zg‘atilib, tergov harakatlari olib borilmoqda.
