Andijonda fuqaro 24 kilogrammdan ortiq narkotik modda bilan ushlandi
Mazkur giyohvand modda qo‘shni davlatdan olib kelingan bo‘lib, Xo‘jaobod tumanidagi xufiya joyga yashirib ketilgan.
Qo‘shni davlatdan kontrabanda yo‘li bilan olib kelingan katta miqdordagi narkotik modda to‘xtatib qolindi. Bu haqda DXX xabar berdi.
Ma’lum qilinishicha, oldindan kuzatuvga olingan, Marg‘ilon shahrida yashovchi, muqaddam narkojinoyat sodir etganligi uchun sudlangan shaxs o‘zining qirg‘izistonlik tanishlari tomonidan Xo‘jaobod tumanidagi xufiya joyga yashirib ketilgan 24 kg 475 gr “gashish” moddasini qabul qilib olgan vaqtida ashyoviy dalillar bilan ushlandi.
Hozirda unga nisbatan Jinoyat Kodeksining 28,246-moddasi (kontrabanda) 2-qismi hamda 25,273-moddasi (giyohvandlik vositalari, ularning analoglari yoki psixotrop moddalarni o‘tkazish...) 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llanildi.
Tergov harakatlari doirasida uning jinoiy sheriklari shaxsiga aniqlik kiritilmoqda.
