Angrendagi ommaviy janjalda 2 kishi pichoqlab o‘ldirildi
Gumondor shaxs qo'lga olinib, jinoyat ishi qo'zg'atildi.
Ijtimoiy tarmoqlarda Toshkent viloyati Angren shahrida ikki nafar shaxs pichoqlanganligi oqibatida vafot etganligi yuzasidan xabar tarqaldi. Mazkur holat yuzasida Toshkent viloyat prokuraturasi rasmiy bayonot berdi.
Ma’lum bo‘lishicha, 2026-yil 22-aprel kuni Angren shahrida bir necha shaxslar o‘rtasida kelib chiqqan og‘zaki janjal davomida ulardan biri oshxona pichog‘i bilan ikki nafar jabrlanuvchiga hayot uchun xavfli bo‘lgan jarohatlar yetkazgan holda qasddan o‘ldirgan.
Mazkur holat yuzasidan Jinoyat kodeksining 97-moddasi (Qasddan odam o‘ldirish) bilan jinoyat ishi qo‘zg‘atilgan.
Jabrlanuvchilarga pichoq bilan tan jarohati yetkazishda gumonlanayotgan shaxs protsessual tartibda ushlangan.
Prokuratura tergov harakatlari har tomonlama, to‘liq va xolisona o‘tkazilishi va natijasi bo‘yicha qonuniy qaror qabul qilinishi ta’minlanishini bildirdi.
