Rossiya Prezidenti yirik shaharlarda mobil internet ishining cheklanishi bo‘yicha izoh berdi
Valdimir Putin mamlakatda kuzatilayotgan internet uzilishlari xavfsizlik sabablariga ko‘ra joriy etilayotganini aytdi.
Rossiya Prezidenti Vladimir Putin mamlakatda kuzatilayotgan internet uzilishlari xavfsizlik sabablariga ko‘ra joriy etilayotganini ma’lum qildi. Bu haqda Reuters xabar berdi.
Ma’lum qilinishicha, u hukumat yig‘ilishida yirik shaharlarda internet bilan bog‘liq muammolar mavjudligini tan oldi. Prezidentga ko‘ra, bunday holatlar odatiy emas, biroq ayrim hollarda yuz bermoqda.
Putin internet cheklovlari terrorchilik hujumlarining oldini olishga qaratilgan tezkor choralar bilan bog‘liq bo‘lishi mumkinligini ta’kidladi. Uning so‘zlariga ko‘ra, bunday vaziyatlarda ustuvorlik aholi xavfsizligini ta’minlashga beriladi.
Shu bilan birga, u huquqni muhofaza qiluvchi organlar muhim xizmatlar uzluksiz ishlashini ta’minlash va muammolarga yechim topishda samarali yondashuvlarni qo‘llashi kerakligini qayd etdi.
Qayd etilishicha, o‘tgan oy Moskvada mobil internet qariyb uch hafta davomida o‘chirib qo‘yilgan. Shuningdek, boshqa hududlarda ham internet vaqtincha cheklanmoqda. Bu choralar Ukraina dronlari hujumlarni boshqarishda internetdan foydalanishi xavfi bilan izohlanmoqda.
Internet uzilishlari biznes vakillari, rasmiylar va fuqarolar tomonidan tanqid qilinmoqda. Ular bank, transport va boshqa kundalik xizmatlardagi uzilishlardan norozi ekanini bildirmoqda.
Kremlga yaqin manbaga ko‘ra, ayrim yuqori lavozimli amaldorlar va bankirlar internet cheklovlarini yumshatish bo‘yicha murojaat qilgan.
Putin internet uzilishlari haqida oldindan ma’lumot berish zararli bo‘lishi mumkinligini aytdi. Uning ta’kidlashicha, bu jinoyatchilarga o‘z harakatlarini moslashtirish imkonini berishi mumkin.
Prezident xavfsizlik va fuqarolik idoralari o‘rtasida hamkorlikni kuchaytirish hamda muhim xizmatlarning uzluksiz ishlashini ta’minlash mexanizmini ishlab chiqish zarurligini qayd etdi.
Mustaqil siyosiy tahlilchi Tatiana Stanovayaning fikricha, Putinning bayonoti internet uzilishlari oqlanishini anglatadi, biroq aholiga bu haqda yaxshiroq tushuntirish berilishi lozim.
