AQSh, Xitoy va Rossiya endi Yevropaga qarshi turibdi — Makron

Fransiya prezidenti Emmanuel Makron Yevropa davlatlarini o‘z manfaatlarini qat’iyroq himoya qilishga va faolroq siyosat yuritishga chaqirdi. Bu haqda Point.md yozmoqda.

 

Farnsiya yetakchisi hozirgi geosiyosiy vaziyatda AQSh, Xitoy va Rossiya Yevropaga nisbatan murakkab pozitsiyada turganini bildirdi.

 

Qayd etilishicha, Makron bu bayonotni Afina shahrida Gretsiya bosh vaziri Kiriakos Mitsotakis bilan o‘tkazilgan muhokama chog‘ida bildirgan. Makronga ko‘ra, hozirgi vaziyat Yevropa uchun “uyg‘onish pallasi”dir.

 

“AQSh, Rossiya va Xitoy rahbarlari Yevropaga nisbatan qarshi pozitsiyada turibdi. Shu bois Yevropa o‘z siyosatini qayta ko‘rib chiqishi zarur”, — dedi u.

 

Makron Yevropa davlatlarini o‘ziga ishonchni oshirish va mustaqil siyosiy kun tartibini shakllantirishga chaqirdi.

 

Uning fikricha, AQSh bilan munosabatlardagi taranglik hatto Donald Tramp prezidentlik muddati yakunlangandan keyin ham saqlanib qoladi. 

 

“Bu vaqtinchalik emas, balki uzoq muddatli tendensiya. Ayrim yo‘nalishlarda hamkorlik davom etishi mumkin, biroq umumiy yondashuv o‘zgarmaydi”, — dedi Makron.

 

Fransiya prezidenti Trampning birinchi muddati Yevropada vaqtinchalik holat sifatida qabul qilinganini, biroq hozir bu qarash o‘zgarganini qayd etdi. Uning so‘zlariga ko‘ra, Yevropa davlatlari endi birlashib, o‘z manfaatlarini faol himoya qilishi zarur.

 

Ma’lum qilinishicha, Makron Afinaga Yevropa kengashining Kiprda o‘tkazilgan norasmiy yig‘ilishidan so‘ng tashrif buyurgan. Gretsiya va Fransiya yaqin kunlarda ikki tomonlama xavfsizlik kelishuvini yangilashni rejalashtirmoqda.