Moskvaga qish qaytdi: hududni qalin qor qopladi
Kuchli qor yog‘ishi sabab Moskva va viloyatda qariyb 200 ta daraxt qulab, avtomobillar va elektr tarmoqlariga zarar yetgan.
Moskva va Moskva viloyatida kuchli qor yog‘ishi hamda shamol tufayli murakkab ob-havo sharoiti yuzaga keldi. Bu haqda Meduza xabar berdi.
Ma’lum qilinishicha, 26-aprel kechidan boshlab ob-havo keskin yomonlashib, dushanba tongiga kelib hududni qalin qor qopladi. Gidromettsentr ma’lumotiga ko‘ra, Moskvada bir kun ichida oylik yog‘ingarchilik me’yorining qariyb yarmi yog‘gan. 27-aprel davomida yana 10 millimetrgacha yog‘ingarchilik tushishi kutilmoqda, qor yog‘ishi kechga borib yanada kuchayishi mumkin.
Noqulay ob-havo sabab Moskva va viloyatda qariyb 200 ta daraxt qulab avtomobillar va elektr tarmoqlariga zarar yetkazgan. Ayrim hududlarda elektr ta’minotida uzilishlar kuzatilgan.
Transport tizimida ham jiddiy uzilishlar qayd etildi. Qulagan daraxtlar sabab Moskvada avtobus yo‘nalishlari o‘zgartirilgan. Moskva metrosining ayrim bekatlari oralig‘ida harakat vaqtincha to‘xtatilgan.
Shuningdek, Vnukovo aeroportida bir necha reyslar kechiktirilgan, Moskvaga yo‘l olgan poyezdlar esa 2,5 soatgacha kechikish bilan harakatlanmoqda. Hudud aholisi yo‘llarda ko‘plab yo‘l-transport hodisalari yuz berayotganini bildirgan.
Avvalroq, Moskva va viloyatda qor, muzlama va kuchli shamol sabab “to‘q sariq” darajadagi ob-havo xavfi e’lon qilingani ma’lum qilingandi.
