Toshkent aeroportida odam savdosi bilan shug‘ullanuvchi guruh a’zosi ushlandi
U 4 nafar qizni aldab, ulardan birini Dubayga olib ketayotgan bo‘lgan.
Toshkentda 4 nafar qizni aldab, ulardan birini Dubayga olib ketayotgan ayol aeroportda qo‘lga olindi. Bu haqda DXX xabar berdi.
Ma’lum qilinishicha, qizlarni xorijiy davlatlarga jinsiy ekspluatatsiya uchun yuborish bilan shug‘ullanuvchi jinoiy guruh vakili bo‘lgan, 2002-yilda Toshkent viloyatining Bo‘stonliq tumanida tug‘ilgan ayol 4 nafar qizni aldab, ulardan birini o‘zi bilan birga Dubay shahriga olib ketayotgan vaqtida Toshkent xalqaro aeroportida to‘xtatib qolindi.
Holat yuzasidan unga nisbatan Jinoyat Kodeksining 135-moddasi (odam savdosi) 2-qismi “z” bandi bilan jinoyat ishi qo‘zg‘atilib, “qamoq” ehtiyot chorasi qo‘llanildi. Hozirda tergov harakatlari olib borilmoqda.
Amaldagi qonunchilikka muvofiq, bu turdagi jinoyatlar uchun 5-yildan 10-yil muddatgacha ozodlikdan mahrum qilish jazosi belgilangan.
