Toshkent viloyatida qiymati 3 mlrd so‘mdan ortiq suv quvurlari talon-toroj qilindi
Holat yuzasidan Piskent tumani suv ta’minoti filiali rahbari va boshqa shaxslarga nisbatan jinoyat ishi qo‘zg‘atildi.
Toshkent viloyatining Piskent tumanida suv ta’minoti obyektida yirik miqdordagi talon-torojlik holati fosh etildi. Bu haqda Korrupsiyaga qarshi kurashish agentligi ma’lum qildi.
Qayd etilishicha, holat Iqtisodiy jinoyatlarga qarshi kurashish departamentining Toshkent viloyat boshqarmasi hamda O‘zsuvta’minot AJ komplayens xizmati bilan hamkorlikda o‘tkazilgan nazorat o‘lchovlari davomida aniqlangan.
Tekshiruvlar Piskent tumani “Guliston” MFY hududida joylashgan “Sag‘anak” suv inshootini tuman suv ta’minoti filiali balansiga o‘tkazish jarayonida bajarilgan qurilish-montaj ishlari doirasida olib borilgan.
O‘rganishlar natijasida “Toshkent viloyati suv ta’minoti” AJ Piskent tumani filiali rahbari B.K. hamda “A.” AJ mansabdor shaxslari oldindan til biriktirib, umumiy qiymati 3 mlrd 931,2 mln so‘mlik suv quvurlarining 3 mlrd 78,4 mln so‘mlik qismini, ya’ni 14 800 metrini qazib olib, o‘zlashtirish yo‘li bilan talon-toroj qilgani aniqlangan.
Mazkur holat yuzasidan mas’ul shaxslarga nisbatan Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atilgan.
