Toshkent viloyatida narkolaboratoriya fosh etildi
Bir nechta shaxslar qo‘lga olinib, 10 kilogrammga yaqin kuchli ta’sir qiluvchi dori vositalari musodara qilindi.
Toshkent shahri va viloyatida kuchli ta’sir qiluvchi dori vositalari savdosi bilan shug‘ullangan jinoiy guruh faoliyatiga chek qo‘yildi. Bu haqda DXX xabar berdi.
Ma’lum qilinishicha, Toshkent shahrining Yangihayot tumanida o‘tkazilgan tezkor tadbir davomida ikki nafar shaxs ushlanib, ularning yonidan 500 dona kuchli ta’sir qiluvchi dori vositalari ashyoviy dalil sifatida olingan. Ularning mazkur dorilarni tarqatish bilan shug‘ullangani aniqlangan.
Keyinchalik ushbu shaxslarga aloqador bo‘lgan yana bir tarqatuvchi ham qo‘lga olinib, uning yonidan ham 500 dona kuchli ta’sir qiluvchi dori vositalari topilgan.
Tezkor tadbirlar davom ettirilib, mazkur dorilarning manbasini aniqlash ishlari olib borilgan. Natijada Toshkent viloyatining Ohangaron shahrida yana uch nafar shaxs qo‘lga olingan. Ularning yashash manzili ko‘zdan kechirilganda narkolaboratoriya tashkil etilgani ma’lum bo‘lgan.
Uyda o‘tkazilgan ko‘rik davomida 9 kilogramm “Pregabalin”, 500 gramm “Tropikamid”, 600 dona “Pregabalin” dori vositalari hamda qadoqlash uchun mo‘ljallangan anjomlar ashyoviy dalil sifatida musodara qilingan.
Hozirda mazkur holat yuzasidan Jinoyat kodeksining 251¹-moddasi 5-qismi bilan jinoyat ishi qo‘zg‘atilib, tergov harakatlari olib borilmoqda.
