Radar qo‘yishdan maqsad faqat pul qilish bo‘lib qolyapti — deputat
Deputat radarlardagi xatoliklar sabab noto‘g‘ri qo‘llanilgan jarimalar haydovchilarga qaytarilishi kerakligini aytdi.
Oliy Majlis Qonunchilik palatasi deputati Davron Aripov yo‘l harakati qoidabuzarliklarini qayd etuvchi radarlarning xususiy sektor qo‘liga o‘tganini, ular hozirda daromad manbayiga aylanib qolganini aytdi. Shuningdek, bu xususida xalqdan norozilik xatlari kelib tushayotgani qayd etildi.
Deputatning bildirishicha, ayrim haydovchilar radarlar orqali tezlik noto‘g‘ri o‘lchanganini isbotlab bergan. Bu holatlar esa noto‘g‘ri qo‘llangan jarimalar bilan bog‘liq muammolarni keltirib chiqarmoqda.
Shu munosabat bilan u xususiy tadbirkorlar zimmasidagi mas’uliyatni kuchaytirish zarurligini bildirdi.
Aripov fikricha, agar texnik xatolik yoki qasddan noto‘g‘ri hisoblash natijasida haydovchilarga asossiz jarima qo‘llangan bo‘lsa, tadbirkorlar zarar ko‘rgan fuqarolarga mablag‘larni to‘liq qaytarishi kerak.
U bunday mexanizm joriy etilsa, tadbirkorlarning mas’uliyat bilan ishlashi oshishini ta’kidladi.
Avvalroq Ichki ishlar vaziriga kamera va radarlar faoliyati bo‘yicha parlament so‘rovi yuborilib, deputatlar asossiz jarimalar, yo‘l belgilari va radarlar joylashuvi bo‘yicha IIVdan izoh talab qilgani haqida xabar berilgandi.
