Moskvada 9-may arafasida mobil aloqa cheklanadi
SMS yuborish xizmatlari va hatto cheklovlar vaqtida ishlashi kerak bo‘lgan maxsus internet resurslar faoliyati ham to‘xtatilishi mumkin.
Moskvada 9-may kuni o‘tkaziladigan harbiy parad arafasida mobil aloqa va internet xizmatlariga keng ko‘lamli cheklovlar joriy etilishi kutilmoqda. Bu haqda BBC manbalarga tayanib xabar berdi.
Ma’lum qilinishicha, Rossiya poytaxtida 5, 7 va 9-may kunlari mobil aloqa to‘liq cheklanadi. Shuningdek, SMS yuborish xizmatlari va hatto cheklovlar vaqtida ishlashi kerak bo‘lgan maxsus “oq ro‘yxat”dagi internet resurslar faoliyati ham to‘xtatilishi mumkin.
Manbalar cheklovlar faqat shahar markazida emas, balki Moskva shahrini aylanib o‘tadigan yirik halqa avtomobil yo‘li (MKAD) hududi doirasida ham amal qilishini bildirgan.
Avvalroq, mart oyi boshidan Moskva markazida mobil internet muntazam uzib qo‘yilgani kuzatilgan. Natijada navigatsiya tizimlari, to‘lov terminallari va ayrim xizmatlar ishlamay qolgan. Internet ta’minoti 24-mart kuni hech qanday rasmiy izohsiz tiklangan.
Keyinroq Rossiya Prezidenti Vladimir Putin internet uzilishlarini xavfsizlik masalalari bilan bog‘liqligini bildirgan.
Shu bilan birga, Rossiya Mudofaa vazirligi 9-may kuni Qizil maydonda o‘tkaziladigan parad dasturi o‘zgartirilganini ma’lum qildi. Unga ko‘ra, 2007-yildan beri ilk bor harbiy texnika kolonnasi ishtirok etmaydi. Kreml esa tadbir “qisqartirilgan formatda” o‘tishini, bunga xavfsizlik bilan bog‘liq omillar va sana yubiley emasligi sabab bo‘layotganini bildirgan.
