Andijonda mahalla raisi va hokim yordamchisi 31 ming dollar pora bilan ushlandi
Ular fuqaroga chorvachilik uchun ajratilgan yerni boshqa shaxsga rasmiylashtirib berish uchun jami 60 ming dollar talab qilgan.
Andijon tumanidagi mahallalardan birida mahalla raisi va hokim yordamchisi ishtirokida yer ajratish bilan bog‘liq qonunbuzarlik holati aniqlandi. Bu haqda Zamon.uz'ga DXX xabar qildi.
Ma’lum qilinishicha, ular o‘zaro til biriktirib, 1967-yilda tug‘ilgan fuqaroga chorvachilik maqsadida ajratilgan 2 sotix yer hamda davlat zaxirasidagi 28 sotix yer maydonini Andijon shahrida yashovchi 1989-yilda tug‘ilgan shaxs nomiga rasmiylashtirib berishni rejalashtirgan.
Ushbu yer maydonining bir qismini noturar, qolgan qismini esa turar joy toifasiga o‘zgartirib berish evaziga ular 57 ming AQSH dollari, shuningdek, kadastr hujjatlarini rasmiylashtirish uchun yana 3 ming AQSH dollari talab qilgan.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbir davomida mazkur shaxslar oldindan 28 ming AQSH dollari va kadastr hujjatlari uchun 3 ming AQSH dollarini olgan vaqtda ashyoviy dalillar bilan ushlangan.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
