Farg‘onadagi tibbiyot texnikumida ayol o‘qituvchilar o'zaro janjallashdi
Mojaro natijasida bir kishi jarohat olib, hodisa yuzasidan sud-tibbiy ekspertiza tayinlangan.
Avvalroq ijtimoiy tarmoqlarda Fargʻona viloyatining Beshariq tumanida joylashgan tibbiyot texnikumida ayol oʻqituvchi kaltaklangani haqida xabarlar tarqaldi. Mazkur mojaro yuzasidan huquqni muhofaza qiluvchi organlar tomonidan tekshiruv ishlari olib borildi.
Viloyat ichki ishlar organlari ma’lumotiga ko‘ra, joriy yilning 30-aprel kuni ta’lim muassasasida faoliyat yurituvchi ikki nafar ayol o‘qituvchi o‘rtasida kelishmovchilik kelib chiqqan. Janjal davomida ulardan biri hamkasbining bosh va ko‘krak qismiga zarba berib, tan jarohati yetkazgan.
Mazkur holat shu kunning o‘zida Ichki ishlar boshqarmasi tomonidan belgilangan tartibda ro‘yxatga olingan. Jabrlanuvchining olgan tan jarohatlari darajasini aniqlash maqsadida sud-tibbiy ekspertiza tayinlangan.
Hozirda hodisa yuzasidan tergovga qadar tekshiruv harakatlari olib borilmoqda. Vaziyat viloyat IIB tomonidan nazoratga olingan.
Avvalroq, Samarqandda maktab direktori o'rinbosari 9-sinf o'quvchisini kaltaklagani xabar berilgan edi
.
