Toshkentda avtomobil ustida raqsga tushgan o‘smirlarga chora ko‘rildi
Voyaga yetmaganlarning ota-onalariga nisbatan ma’muriy bayonnoma rasmiylashtirildi.
Ijtimoiy tarmoqlarda yo‘lning qatnov qismida avtomobil tomiga chiqib raqsga tushgan voyaga yetmaganlar aks etgan video tarqaldi. Mazkur holat yuzasidan Toshkent shahar IIBB rasmiy munosabat bildirdi.
Ma’lum qilinishicha, hodisa joriy yilning 26-aprel kuni tungi soat 02:00 atrofida Yunusobod tumanidagi Amir Temur – Alisher Navoiy hamda Alisher Navoiy – Shahrisabz ko‘chalari kesishmasida sodir bo‘lgan. Unda Nexia-2 rusumli avtomobil tomiga bir nechta voyaga yetmagan shaxslar chiqib, yo‘l o‘rtasida raqsga tushgan.
Aniqlanishicha, haydovchi voyaga yetmaganlar bilan muloqotga kirishib, avtomobildagi musiqa ovozini balandlatgan hamda ularning ushbu harakatiga sharoit yaratgan. Natijada yo‘l bezoriligi sodir etilgan.
Holat yuzasidan haydovchiga nisbatan Ma’muriy javobgarlik to‘g‘risidagi kodeksning 128-prim 10-moddasi 1-qismi asosida ma’muriy bayonnoma rasmiylashtirildi, avtomobil esa jarima maydoniga joylashtirildi.
Ma’lumotlarga ko‘ra, voyaga yetmaganlar Surxondaryo viloyatida istiqomat qiladi va ota-onasining qarovisiz Toshkent shahrida bo‘lgan. Ular Surxondaryo viloyati IIB huzuridagi voyaga yetmaganlarga ijtimoiy-huquqiy yordam ko‘rsatish markaziga yuborilgan.
Shuningdek, voyaga yetmaganlarning ota-onalariga nisbatan MJtKning 47-moddasi asosida ma’muriy bayonnoma rasmiylashtirilgan.
