Buxoroda onlayn qimor o‘yini logotipi tushirilgan banner bo‘yicha ish sudga oshirildi
Ushbu banner Nodir Devonbegi madrasasi oldiga MMA bo‘yicha musobaqadan avval o‘tkazilgan matbuot anjumanida o‘rnatilgan.
Nodir Devonbegi madrasasi oldiga onlayn qimor o‘yiniga oid reklama elementlarini o‘z ichiga olgan banner o‘rnatilgani aniqlandi. Bu haqda Madaniy meros agentligi ma’lum qildi.
Ma’lumotlarga ko‘ra, Buxoro shahrida 30 aprel kuni aralash jang san’atlari (MMA) bo‘yicha musobaqa o‘tkazilishi kerak bo‘lgan. Turnirdan oldingi matbuot anjumani shahardagi Nodir Devonbegi madaniy meros obyekti hududida o‘tkazilgan. Ushbu anjumanda madrasa oldiga onlayn qimor o‘yinlarini tashkil qiluvchi bukmekerlik kompaniyasining logotipi ham tushirilgan reklama banneri o‘rnatilgan.
Qayd etilishicha, mazkur obyekt Vazirlar Mahkamasining 2019-yil 4-oktyabrdagi 846-son qaroriga muvofiq moddiy madaniy meros obyekti sifatida davlat muhofazasiga olingan. Shuningdek, u YUNESKO Umumjahon merosi ro‘yxatiga kiritilgan hudud tarkibiga kiradi hamda milliy va xalqaro miqyosda alohida tarixiy, me’moriy va madaniy ahamiyatga ega yodgorlik hisoblanadi.
Amaldagi tartiblarga ko‘ra, madaniy meros obyektlari hududida har qanday ommaviy tadbirlar Madaniy meros agentligi bilan kelishilgan holda va tegishli ruxsatnoma asosida o‘tkazilishi lozim. Biroq o‘rganishlar davomida tadbirni tashkil etish bo‘yicha tasdiqlangan nazorat reja agentlik bilan kelishilmagani aniqlangan.
Agentlikning Buxoro viloyati boshqarmasi tomonidan 2026-yil 28-aprel kuni mas’ullarga tadbirni ruxsatnoma olinmaguncha to‘xtatish bo‘yicha ko‘rsatma berilgan. Shunga qaramay, tadbir o‘tkazilgani aniqlanib, 29-aprel kuni holat yuzasidan dalolatnoma rasmiylashtirilib, hujjatlar to‘plangan.
Mazkur holat bo‘yicha Ma’muriy javobgarlik to‘g‘risidagi kodeksning 198⁵-moddasi 1-qismiga asosan ma’muriy bayonnoma tuzilib, ish materiallari sud organlariga yuborildi.
Agentlik bunday holatlarni madaniy meros obyektlariga nisbatan hurmatsizlik sifatida baholab, ularning tarixiy qiyofasi va madaniy ahamiyatiga salbiy ta’sir ko‘rsatishini ta’kidladi. Shuningdek, barcha davlat idoralari va tadbirkorlar madaniy meros obyektlarini asrash va qonunchilik talablariga qat’iy rioya etishga chaqirildi.
