Navoiy viloyatida oltinni noqonuniy qazib olish va qayta ishlash holati aniqlandi
Tomdi tumanida umumiy bahosi 569,8 mln so‘m bo‘lgan ma’danli toshlar ashyoviy dalil sifatida olindi.
2026-yil yanvar–mart oylarida bir nechta hududda oltinni noqonuniy qazib olish va qayta ishlash bilan bog‘liq holatlar aniqlanib, to‘xtatildi. Bu haqda Bu haqda Iqtisodiy jinoyatlarga qarshi kurashish departamenti xabar berdi.
Ma’lum qilinishicha, Tomdi tumanida o‘tkazilgan tezkor tadbirda fuqaro O.I. va boshqa shaxslar “Bessopan” sanoat maydonida umumiy bahosi 569,8 mln so‘mlik, tarkibida 315,1 gramm oltin moddasi mavjud bo‘lgan 5 200 kg ma’danli toshlarni noqonuniy qazib olayotgan vaqtida ushlanib, ushbu mahsulotlar ashyoviy dalil sifatida rasmiylashtirildi.
Shuningdek, Konimex tumanida o‘tkazilgan tadbirda fuqarolar T.T. va T.G‘. “Karakata” OFY hududida o‘zaro til biriktirib, tarkibida oltin mavjud qum va toshlarni maxsus uskunalar yordamida noqonuniy qazib olish bilan shug‘ullanib kelayotgani aniqlangan.
Xatirchi tumanida esa fuqaro U.R. “Zarafshon” MFYdagi xonadonida qum va toshdan oltin ajratib olish bilan shug‘ullanib kelgani fosh etilib, undan tarkibida oltin zarralari bo‘lgan 160 kg qum-tosh ashyoviy dalil sifatida olingan. Shu hududda yana bir fuqaro S.X. ham xuddi shunday faoliyat bilan shug‘ullangani aniqlanib, undan 300 kg qum-tosh shyoviy dalil sifatida olingan.
Mazkur holatlar yuzasidan Jinoyat kodeksining 196-2-moddasi (foydali qazilmalarni ruxsatnomasiz qazib olish) bilan jinoyat ishlari qo‘zg‘atilib, tergov harakatlari olib borilmoqda.
