“Chorsu” metro kirish qismida drenaj tizimi tiklanmoqda
Drenaj tarmoqlarining yopilishi suv oqimini cheklab, metro kirishida suv to‘planishiga sabab bo‘lgan.
Toshkent shahridagi “Chorsu” metro bekati kirish qismida yuzaga kelgan suv to‘planishi holati yuzasidan drenaj tizimini tiklash ishlari boshlandi.
Poytaxt hokimligi ma’lumotiga ko‘ra, 3-may kuni kuzatilgan yog‘ingarchilik vaqtida hududdagi irrigatsiya va drenaj tarmoqlarining ayrim qismlari noqonuniy ravishda yopib qo‘yilgani suv oqimining cheklanishiga olib kelgan. Natijada metro bekati kirish qismida suv yig‘ilishi kuzatilgan.
Mutaxassislarning ta’kidlashicha, mavjud drenaj tizimi sutkasiga 20 mm yog‘ingarchilikni qabul qilish quvvatiga ega. Biroq mazkur holatda ikki soat davomida yog‘gan 12 mm yomg‘irga qaramay, tizim to‘liq ishlamagan. Bunga ayrim hududlarda avtoturargohlar va piyodalar yo‘laklari qurilishi jarayonida irrigatsiya tarmoqlarining to‘sib qo‘yilgani sabab bo‘lgan.
Shuningdek, ilgari mazkur hududda bunday muammolar kuzatilmagani, chunki drenaj tizimlari to‘liq va uzluksiz faoliyat yuritgani qayd etildi.
Vaziyatni bartaraf etish maqsadida hozirda yopib qo‘yilgan drenaj tarmoqlarini tozalash, ularni qayta tiklash hamda yangi muhandislik kommunikatsiyalarini yotqizish ishlari olib borilmoqda. Kelgusida shunga o‘xshash holatlarning oldini olish uchun 36 km uzunlikdagi irrigatsiya va drenaj tarmoqlarini qamrab oluvchi kompleks master-reja ishlab chiqilgan.
