Oq uy yaqinida otishma sodir bo‘ldi, bir bola yaralandi
Hujumning AQSh prezidenti Donald Trampga qaratilgan bo‘lishi mumkinligi o‘rganilmoqda.
AQSh poytaxti Vashingtonda Oq uy yaqinida qurollangan shaxs bilan otishma sodir bo‘ldi. Bu haqda Al Jazeera xabar berdi.
AQSh Maxfiy xizmati ma’lumotiga ko‘ra, gumonlanuvchi agentlarga qarata o‘q uzganidan so‘ng javob o‘qi bilan yaralangan.
Hodisa dushanba kuni yuz bergan. Fuqarolik kiyimidagi agentlar qurol ko‘tarib yurgan “shubhali shaxs”ni aniqlab, uni kuzata boshlagan. Keyinchalik voqea joyiga yetib kelgan forma kiygan xodimlar gumonlanuvchini qo‘lga olishga uringan, biroq u qochishga harakat qilib, o‘q uzgan. Shundan so‘ng agentlar javob o‘qi otgan.
Yaralangan shaxs shifoxonaga olib ketilgan, undan o‘qotar qurol topilgan. Hodisa yuzasidan Kolumbiya Metropolitan politsiyasi tomonidan tergov harakatlari olib borilmoqda.
Otishma vaqtida bir nafar bola ham jarohat olgan, biroq uning hayotiga xavf yo‘qligi aytilmoqda. Tergovchilar dastlabki ma’lumotlarga ko‘ra, bola gumonlanuvchi tomonidan yaralangan bo‘lishi mumkinligini bildirmoqda.
Rasmiylarga ko‘ra, hujumchi AQSh prezidenti Donald Trampni nishonga olgan-olmagani aniqlanmoqda. Shuningdek, hodisadan sal avval hududdan o‘tgan vitse-prezident Jey Di Vens korteji bilan bog‘liqlik aniqlanmagan.
Mazkur voqea o‘tgan oy Oq uy muxbirlari kechasida Trampga nisbatan sodir etilgan suiqasdga urinishdan so‘ng yuz berdi. O‘shanda 31 yoshli Koul Tomas Allen prezidentni o‘ldirishga urinishda ayblanib qo‘lga olingan.
