Surxondaryoda 7,7 gektar yerni 800 mlnga sotmoqchi bo‘lgan fermer ushlandi
Fermer qishloq xo‘jaligiga mo‘ljallangan yer maydonini fuqaro nomiga rasmiylashtirib bermoqchi bo‘lgan.
Surxondaryoda fermer yer maydonini noqonuniy sotmoqchi bo‘lgan vaqtida ushlandi. Bu haqda DXX xabar berdi.
Ma’lum qilinishicha, Angor tumanida fermer xo‘jaligi rahbari qishloq xo‘jaligiga mo‘ljallangan 7,7 gektar yer maydonini fuqaro nomiga rasmiylashtirib berish evaziga 800 million so‘m talab qilgani aniqlandi.
Fermer ushbu mablag‘ning 520 million so‘mini oldindan olgan. Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbirda fermer qolgan 280 million so‘mni olayotgan vaqtida ashyoviy dalillar bilan qo‘lga olindi.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
