Toshkentning yangi xalqaro aeroporti ochilgach, eskisi yopiladi
Hozirgi aeroport imkoniyatlarini 2029-yilgacha to‘liq sarflab bo‘lishi kutilmoqda.
Toshkentning yangi xalqaro aeroporti qurilish ishlari 2025-yil iyul oyida boshlanishi rejalashtirilmoqda. Bu haqda 5-may kuni Samarqandda bo‘lib o‘tayotgan Osiyo taraqqiyot banki yig‘ilishi doirasida transport vaziri o‘rinbosari Jasurbek Choriyev ma’lum qildi, deya xabar bermoqda Gazeta.uz.
Jasurbek Choriyevning so‘zlariga ko‘ra, loyiha bo‘yicha davlat-xususiy sheriklik (DXSH) to‘g‘risidagi bitim yakuniy bosqichda bo‘lib, hujjat may oyining o‘rtalarigacha imzolanishi kutilmoqda.
“Toshkentning yangi xalqaro aeroporti qurilishini iyul oyida boshlaymiz. Bu allaqachon aniq. Davlat-xususiy sheriklik bo‘yicha kelishuv may oyining o‘rtalarigacha imzolanishi lozim. Hozirda u yakuniy bosqichda turibdi. Imzolashimiz bilan hukumat tomonidan qisqa ko‘rib chiqiladi, rozilik olishimiz bilan qurilishni boshlaymiz. Prezident iyul oyidan ishlarni boshlash bo‘yicha aniq topshiriq bergan”, — dedi u.
Vazir o‘rinbosari loyiha ishtirokchilari allaqachon tayyor ekanini, gap yirik xalqaro konsorsium haqida ketayotganini ta’kidladi.
“Ishtirokchilar allaqachon tayyor, u yerda katta konsorsium tuzilgan. Biz xususiy investor bilan ham xususiy, ham davlat sherigi tomonidan qo‘yiladigan barcha shartlar bayon etilgan asosiy hujjatni imzolashimiz kerak”, — dedi Jasurbek Choriyev.
Uning qayd etishicha, davlat aeroportni yo‘lovchilar oqimi bilan ta’minlash bo‘yicha aniq majburiyatlarni o‘z zimmasiga olmaydi.
Toshkentning amaldagi aeroporti kelajagi haqida savolga javoban vazir o‘rinbosari yangi aeroport ishga tushirilgach, eskisini yopish rejalashtirilayotganini bildirdi.
“Aslida konseptual yechim bor, xususiy sherik bilan kelishilgan shartlar mavjud. Agar yangisini ochsak, eskisini yopishimiz kerak. Bu mantiqan to‘g‘ri. Uning o‘rnida aynan nima bo‘lishi esa hozircha noma’lum”, — dedi Jasurbek Choriyev.
“Yangi Toshkent” xalqaro aeroporti Toshkent viloyatining O‘rta Chirchiq va Quyi Chirchiq tumanlari hududida, 1300 gektar maydonda quriladi. Prezident Shavkat Mirziyoyev 2025-yil oktyabr oyida qurilishga start bergan.
Yangi aeroport qurilishi qarori so‘nggi sakkiz yil ichida poytaxtga yo‘lovchi oqimi uch baravar oshib, yiliga 9 million kishiga yetishi, 2040-yilga borib esa 24 milliondan oshishi prognoz qilingani bilan izohlanadi.
Amaldagi aeroport 11 million yo‘lovchiga mo‘ljallangan bo‘lib, u shahar ichida joylashgan.
Loyiha davlat-xususiy sheriklik asosida amalga oshiriladi. Konsorsium tarkibi quyidagilardan iborat:
- Vision Invest (Saudiya Arabistoni) — 45%
- Sojitz Corporation (Yaponiya) — 30%
- Incheon International Airport Corporation (Janubiy Koreya) — 15%
- Uzbekistan Airports (O‘zbekiston) — 10%
Loyiha to‘rt bosqichda amalga oshirilishi rejalashtirilgan. Birinchi bosqich qiymati 2,5 mlrd dollar bo‘lib, u aeroport terminali va aerodrom qurilishini o‘z ichiga oladi.
Aeroport ishga tushgach, yiliga 20 million yo‘lovchi va 129 ming tonna yukni qabul qilish, soatiga 30 tagacha parvoz-qatnovni amalga oshirish hamda bir vaqtning o‘zida 62 ta samolyotni qabul qilish imkoniyatiga ega bo‘ladi.
Yangi aeroport majmuasi Toshkent — Samarqand, Toshkent — Andijon va Toshkent — Bo‘stonliq avtomobil yo‘llariga to‘g‘ridan-to‘g‘ri ulanadi. Shuningdek, yuqori tezlikdagi poyezdlar uchun temiryo‘l vokzali qurilishi va Toshkent hamda “Yangi Toshkent” markazlari o‘rtasida avtobus qatnovi yo‘lga qo‘yilishi rejalashtirilgan.
