Prezident Shavkat Mirziyoyev Si Szinpinga hamdardlik bildirdi
Xunan provinsiyasidagi portlash oqibatida 21 kishi halok bo‘lib, 61 kishi jarohat olgan edi.
Prezident Shavkat Mirziyoyev Xitoy Xalq Respublikasi Raisi Si Szinpinga Xunan provinsiyasidagi sanoat korxonasida yuz bergan fojia oqibatida ko‘plab insonlar halok bo‘lgani va jarohat olgani munosabati bilan chuqur hamdardlik bildirdi.
Davlat rahbari halok bo‘lganlarning oila a’zolari va yaqinlariga sabr-toqat tilab, jabrlanganlarning tez fursatda sog‘ayib ketishini tiladi.
Avval xabar qilinganidek, Liuyang shahridagi pirotexnika zavodida sodir bo‘lgan kuchli portlash oqibatida kamida 21 kishi halok bo‘lgan, 61 kishi turli darajada tan jarohati olgan.
Qidiruv-qutqaruv ishlariga qariyb 500 nafar xodim jalb etilgan bo‘lib, hodisa joyida vayronalar ostida qolganlarni aniqlash uchun zamonaviy robot texnologiyalaridan ham foydalanilgani ma’lum qilingan edi.
